Djabièrnè 3 di yüni 2016 e reunionnan di IPKO a terminá, firmando e lista di palabrashon. Delegashon di Kòrsou por mira bek riba un IPKO positivo. A palabra por ehèmpel ku kada pais lo stipulá maneho riba kambio klimátiko i energia. I ku lo tin interkambio i koperashon riba e terenonan aki entre tur e kuater paisnan den Reino.
Un tema aktual ku tin atenshon di tur e paisnan ta e situashon sosial polítiko preokupante na Venezuela. E punto aki a keda agregá na e agènda di IPKO mirando e relevansia di esaki. En todo kaso e kuater paisnan lo sigui vigilá e situashon i interkambiá informashon pa e paisnan por ta prepará riba kualke posibel senario.
E punto di areglo di disputa (geschillenregeling) tabata un punto kardinal den tantu e deliberashonnan di IPKO komo esnan di Tripartit. Durante di Tripartit a logra yega na un teksto komun ku e tres delegashonnan a aprobá na final. E konsepto aki lo bira e vershon ku finalmente mester keda entrega via e gobièrnunan di Aruba, Sint Maarten i Kòrsou pa tratamentu den “Tweede Kamer”.
Aktualmente tin dos konsepto di Lei di Reino (Rijkswet) enkuanto e areglo di disputa ku a keda prepará.
Unu di Minister di Asuntunan Interior i di Reino, Señor Plasterk,ku aworakí ta den fase di konsulta via internèt;
E vershon di Aruba, Sint Maarten i Kòrsou, den kua a mantené e tres puntonan di salida manera palabrá den Parlamento di Kòrsou. (un instansia independiente pa trata e disputanan (1), ku ta tuma desishonnan final (2) riba disputanan hurídiko (3)).
Tur e delegashonnan di IPKO a tuma nota di e dos vershonnan aki i ta konsiderá esaki komo un progreso pa yega finalmente na un Lei di Reino pa atendé disputanan entre e paisnan den Reino. Entre aworakí ku desèmber lo tin kontaktonan parlamentario pa kaba di konkretisá esaki. E delegashonnan a palabra ku nan lo hasi tur nan esfuerso pa e trayekto di Lei kuminsá den “Tweede Kamer” pa mas tarda fin di aña.
E delegashon di Kòrsou por mira bek riba un IPKO satisfaktorio. Unánimemente e miembronan a ekspresá nan mes positivo pa ku e logronan di IPKO, spesialmente e trayekto di areglo di disputa.