Dia 25 i 26 di aprel próksimo Kòrsou ta ta esenario i anfitrion di dos (2) komishon figo di e Parlamento di Latino Amérika i Karibe “Parlatino”. E reunion di Parlatino aki lo konta ku delegashonnan di paisnan manera Aruba, Argentina, Chile, Costa Rica, Cuba, El Salvador, Kòrsou, México, Venezuela, Paraguay i Uruguay. 

E dos komishonnan ku lo reuní na Kòrsou ta:

  • 'Comisión de medio ambiente y turismo’
  • ‘Comisión de igualdad de género, niñez y juventud’.

‘Comisión de medio ambiente y turismo’ lo trata diferente tópiko, manera Konstitushon di medio ambiente; Impakto di fenómenonan di naturalesa i di medio ambiente i e impakto di globalisashon riba medio ambiente.

Miéntras ku e ‘Comisión de igualdad de género, niñez y juventud’ tin e siguiente tópikonan riba agènda, Liderazgo di hende muhé den polítika den ámbito lokal i regional; koperashon internashonal riba maneho gubernamental relashoná ku mucha i adolesente i proyekto di lei modelo riba salubridat seksual i reproduktivo, ku énfasis riba prevenshon di embaraso bou di hóben. 

Ta tradishon ku durante e tipo di enkuentronan internashonal asin’aki ku e pais wéspet, riba petishon dje komishonnan mes ta organisá bishitanan di trabou pa un òf mas instansia, kompania òf instituto ku tin un ròl klave den un òf otro sektor òf industria ku ta relatá na e tema di momentu di nan reunion. Den e kaso aki e delegashonnan di Parlatino lo hasi un rekorido na entre otro ‘Klein Hofje, Tera Kòrá I Shete Boka. 

Un tim dje sekretariado di e ofisina prinsipal di Parlatino na Panamá tambe lo ta presente ku huntu ku e staf i personal di Grefi di Parlamento di Kòrsou lo kordiná i asesorá e delegashonnan durante nan reunion aki.

E reunionnan di Parlatino ta duna miembronan di tur e Parlamentonan ku ta partisipá, e oportunidat pa komunikashon direkto ku otro i interkambiá informashon i eksperensia lokal i legislativo.

Miembronan di Parlamento di Kòrsou semper a forma parti i partisipá aktivamente den e diferente komishonnan. Na mas ku un okashon miembronan di Parlamento di Kòrsou a traha riba proyektonan di Lei Macro ku éksito. E leinan aki ta sirbi komo modelo pa paisnan ku ta deseá, adoptá den nan legislashon lokal. 

Parlatino a keda fundá 16 di novèmber 1987 na Lima, Perú. Antia Hulandes tabata forma parti formalmente di Parlatino, na momento ku Konseho di Minister di Reino a ratifiká e tratado pa lanta Parlatino na novèmber 1987. Sinembargo, for di 1971 Parlamento di Antia Hulandes tabata opservador kaba na reunionnan di e komishonnan di Parlatino. Despues ku Antia a keda disolvé na 2010, Parlamento di Kòrsou a sigui komo miembro. 

Un yu di Kòrsou, den persona di sr. Richardo Elhage (q.e.p.d) a okupá e puesto di mas haltu den e órgano regional aki esta esun di Presidente di Parlatino di 17 di febrüari 1975 te ku 25 di aprel 1977. 

Galeria di portrèt