Apertura di e Aña Legislativo 2024-2025
Parlamento di Kòrsou durante un Reunion Públiko Solèm, a hasi apertura di e Aña Legislativo 2024-2025.
Djamars 10 di Sèptèmber 2024, E di dos djamars di luna di sèptèmber, ta e dia ku Parlamento di Kòrsou ta inisiá su Aña Legislativo nobo.
Durante e reunion solèm diferente dignatarionan i instansianan a hasi akto di presensia.
Gobernador di Kòrsou, Su Ekselensia señora Lucille George-Wout, a trese e diskurso di órden kaminda Su Ekselensia a trese e plannan ku e gobièrnu aktual, Gabinete Pisas II, tin den tapara pa e aña 2025, kual ta keda reflehá den e konsepto pa presupuesto di pais.
Despues di e reunion solem, Minister di Finansa señor Javier Silvania a presentá ofisialmente e presupuesto pa aña 2025 na Presidente di Parlamento señora. Charetti America-Francisca. Esaki ta pa kumpli ku e fecha pa entrega konforme e Areglo di Estado i tradishonalmente ta tuma lugá despues di apertura di Aña Parlamentario nobo.
E presupuesto ta un parti krusial di e maneho pa e aña benidero, ku ta duna un splikashon di e planifikashon finansiero di tur ministerio den di gobièrnu.