Historia
Genéréux Jacob Richard de Lima (1811-1878)
Genéréux Jacob Richard de Lima (‘Shon Genereus’) a keda apuntá riba 1 di mart 1868 pa Rei den Konseho Kolonial. E tabata e promé miembro di koló. Durante di un reunion di Konseho Kolonial riba djaluna 22 di novèmber 1869 De Lima komo promé hende ta lanta i eksihí pa kaba ku e diskriminashon kontra di Kòrsou i yunan di Kòrsou. E tabata ke, pa meskos ku ta tuma lugá riba e otro islanan, ku na Kòrsou tambe por a vota pa su representantenan. Su petishon a keda rechasá.
Abraham Mendez Chumaceiro (1841-1902)
Abraham Mendez Chumaceiro ta keda konsiderá komo e bosero di un grupo ku a lanta na Kòrsou pa boga pa derechi di voto limitá basa riba nivel di entrada i enseñansa. Den su artíkulo “Zal het kiesrecht Curacao tot het Kannibalisme Voeren?”, Chumaceiro a kontestá un ámtenar Hulandes ku na nòmber di élite protestant blanku a bisa den un publikashon anterior, ku derechi di voto lo hiba Kòrsou na kanibalismo, adorashon di diosnan falsu i brueria. Chumaceiro nunka a detayá su plan di derechi di voto, pero a bisa ku esaki “meresé un estudio profundo”.
Moises Frumencio da Costa Gomez (1907-1966)
Moises Frumencio da Costa Gomez apénas a drenta e promé Parlamento di nos pais riba 5 di aprel 1938 ku a presentá riba 3 di yüni 1938 e promé proyekto di lei pa amplia e demokrasia hóben ku nos a haña na 1937. Despues di esaki a sigui hopi kambio ku ta kulminá den realisá e promé parti di su soño: outonomia interno. Derechi di voto universal a bira un realidat na 1948, outonomia interno parsial (Interimregeling) a bira un realidat na 1951 i outonomia interno manera nos konosé den Statüt a keda formalisá na 1954.
Modesto Apostel ‘Chano’ Margaretha (1911-1990)
Modesto ‘Chano’ Margaretha tabata e promé hende ku a tuma un kurashon pa Papiamentu durante di un debate den Konseho Insular riba 8 di febrüari 1958. Apesar di a keda stroba, Chano Margaretha a persistí i kontinuá na Papiamentu. E no a hasi esaki pa kousa problema. E tabata konvensí ku e hendenan ku a vota p’e mester por a komprond’é ora e ta trese su puntonan dilanti den Konseho Insular. Pa Margaretha, demokrasia no tin sentido si e hende ku bo ta representá no por sigui su parlamentario.
John Horris Sprockel (1892 - 1970)
John Horris Sprockel tabata e promé Presidente di “Staten van Curaçao”, na momentu ku a instalá esaki pa di promé biaha dia 5 di aprel 1938. “Staten van Curaçao” e tempu ei tabata parlamento pa e islanan Kòrsou, Aruba, Boneiru i Sint Maarten, Sint Eustatius i Saba. Señor Sprockel su karera den Parlamento no a kuminsá via voto popular. Ta Gobernador a nombr’é kome Presidente di nos promé Parlamento. E tempu ei dies di e diesinku miembronan di Parlamento tabata eligí, miéntras sinku tabata nombrá pa Gobernador. Na 1932 Lareina a apuntá John Horris Sprockel pa tuma asiento den Konseho Kolonial konsiderá un vershon kolonial di nos Parlamento aktual. Na novèmber 1941 a elegí señor Sprockel pa promé biaha via voto popular. John Horris Sprockel a fungi komo Presidente di Parlamento di Kòrsou di aprel 1938 te 1945. Señor Sprockel a fungi tambe komo e promé Minister di Enseñansa den e promé Konseho di Gobièrnu (Regeringsraad) di Antia Hulandes (1951-1954).